120 دولار جديدة تهدد خطة مصر في تحقيق 30 مليون سائح.. شوف اية الحكاية
علي مدار سنين كتيرة فاتت، الدولة عملت جهود كتيرة جدا لتنشيط حركة السياحة الوافدة لمصر، وده ضمن أهداف ورؤية الدولة 2030 لتحقيق 30 مليون دولار وتحقيق 30 مليون سائح، واللي كان آخرها الحدث الأهم في العالم وهو افتتاح المتحف المصري الكبير.
جهود الترويج السياحي لمصر بالخارج
الجهود اللي بتقوم بيها الدولة من الترويح الكبير للمقاصد السياحية المصرية واللي طبعا الهدف منها وضع مصر في مقدمة اهتمامات السائحين، واللي بتحظي باهتمام كبير جدا من كل اجهزة الدولة علي رأسهم القيادة السياسية للدولة ممثلة في الرئيس عبدالفتاح السيسي.
علي الرغم من كل الجهود اللي بتقوم بيها الدولة للترويج للسياحة المصرية، في حاجة بدأت تظهر بتهدد السياحة المصرية بشكل كامل وهو مشروع القرار المفاجئ اللي أقره مجلس النواب بزيادة رسوم تأشيرة الدخول لمصر بمبلغ دولاري إضافي بخلاف قيمة التاشيرات الحالية.
الزيادات الجديدة في رسوم تأشيرات الدخول
الزيادات الجديدة في أسعار رسوم تأشيرات الدخول اتحاد الغرف السياحية ندد بيها وبعت استغاثة لكل المسؤولين في الدولة المصرية علي رأسهم رئيس مجلس الوزراء الدكتور مصطفى مدبولي، ووزير السياحة والآثار شريف فتحي للتدخل الفوري والعاجل لوقف مشروع القرار واللي كان بند من بنود مشروع القانون اللي قدمته الحكومة لفرض رسوم على الخدمات اللي بتقدمها وزارة الخارجية داخل وخارج مصر، ومجلس النواب وافق عليه مؤخرا .
اتحاد الغرف السياحية قال أن القرار في حالة تنفيذه سياثر بالسلب على الحركة السياحية الوافدة إلي مصر وهيحد من زيادتها وهيضعف موقف السياحة المصرية لصالح المنافسين في المنطقة .
علي طول اتحاد الغرف السياحية بعت خطاب عاجل لوزير السياحة والآثار شريف فتحي وطالبت التدخل لحل الأزمة قبل ما تتحول لكارثة بتهدد صناعة مهمة في مصر وهيا صناعة القطاع السياحي واللي بيعد واحد من الروافد المهمة حاليا في الناتج القومي المصري .
استغاثة اتحاد الغرف السياحية لوزير السياحة والآثار
الاستغاثة اللي بعتها اتحاد الغرف السياحية لوزير السياحة والآثار، أكدوا فيها أن كل منظمي الرحلات قالوا إن القرار هيؤثر بالسلب على أعداد السياحة الوافدة وهيكون سبب في خفض أعداد مقاعد الطيران من كل منظمي الرحلات بكل الأسواق المصدرة للسياحة المصرية، وده اللي ظهر في فعاليات بورصة لندن السياحية الدولية واللي انتهت من كام يوم واللي شاركت فيها مصر بجناح مهم جدا، خصوصا أن كل منظمي الرحلات اتكلموا عن القرار وتأثيره في زيادة أسعار وقيم البرامج السياحية .
اتحاد الغرف السياحية اتكلم في استغاثته لوزير السياحة والآثار وقال إن القرار هيدي ميزة تنافسية للأسواق السياحية المنافسة لمصر علشان تكون أكثر جذبا للسائح خصوصا انها بتقدم أسعار أكثر تنافسية، خصوصا أن القرار الجديد هيرفع أسعار البرامج السياحية في مصر باكثر من 120 د لار عن أقرب دولة منافسة لينا في المنطقة بسبب رسوم التأشيرة وتكلفة وقود الطائرات وأسعار الخدمات الأرضية بالمطارات واي زيادة إضافية هتزيد معها الفجوة بين الدول المنافسة لمصر وهيؤدي لتراجع النمو السياحي .
اتحاد الغرف قال كمان في استغاثته لوزير السياحة والآثار أن الدول المجاورة والمنافسة لينا في قطاع السياحة بتصدر تأشيرات دخول لرعايا دول الاتحاد الأوروبي واللي بتشكل الأغلبية العظمى من الجنسيات الوافدة إلى مصر بدون مقابل، وأكدوا أن القرار بيمحي كل الجهود اللي بتقوم بيها الدولة للوصول للهدف الأكبر وهو تحقيق 30 مليون سائح في 2030 .
