عقوبات وغرامات السياحة والآثار علي مخالفي زيارة المتحف المصري الكبير (فيديو)

أسبوع بالتمام والكمال فات لحد دلوقتي علي فتح باب الزيارة بالمتحف المصري الكبير قدام المواطنين والسائحين اللي عايزين يدخلوا يتفرجوا علي التحف والآثار النادرة اللي معروضه جوا القاعات.. واللي أهمهم آثار وكنوز الملك الذهبي توت عنخ آمون.

الإقبال الجماهيري علي المتحف المصري الكبير 

خلال الاسبوع اللي فاتت.. حصل عدد كبير من المشاهد اللي ممكن تجبر وزارة السياحة والآثار.. أنها تصدر قرارات هتغير مسارات الزيارة بشكل كامل جوا المتحف.. ده بهدف تنظيم الزيارات والحفاظ علي القطع الأثرية المعروضة بالقاعات.

أول المشاهد اللي حصلت في المتحف المصري الكبير كان يوم الجمعة اللي فات.. لما المتحف شهد اقبال غير عادي من المواطنين اللي عايزين يستغلوا إجازة الاسبوع الويك آند وأخذوا أسرهم وراحوا المتحف.. وفي الوقت ده إدارة المتحف فؤجت بزحف غير طبيعي من الناس اللي عايزة تدخل تشوف القاعات.. فاضطرت وزارة السياحة والاثار أنها تأخذ قرار بإغلاق باب حجز تذاكر الدخول.. بسبب وصول الزيارة لكامل الطاقة الاستيعابية للمتحف باكثر من 20 الف زائر  .

الزحف الجماهيري اللي حصل علي المتحف المصري الكبير انعكس علي الاهرامات.. خصوصا أن الأسر لقت نفسها وصلت للمتحف ومش هتعرف تحجز تذاكر.. فقالوا تروح نتفرج علي الأهرامات ونزور واحدة من عجائب الدنيا السبع.. وده خلي عدد الناس اللي زاروا الاهرامات في اليوم ده يوصل لأكثر من 30 الف زائر.. وده رقم يمكن محصلش قبل كده في تاريخ الزيارة بالمنطقة الأثرية .

تحديد إعداد الزائرين للمتحف المصري الكبير 

قرارات وزارة السياحة والآثار متوقفتش علي كده.. لا ده كمان صدر قرار وزاري من وزير السياحة والآثار باقتصار حجز التذاكر أيام الجمعة والسبت والعطلات الرسمية علي الموقع الالكتروني للمتحف.. ومش هيكون في الايام دي حجز تذاكر من شبابيك الحجز بالمتحف المصري الكبير... والهدف من القرار ده هو حصر الاعداد اللي حجزت التذاكر.. وده بهدف تنظيم الزيارة وضمان الحفاظ علي القاعات والمعروضات الأثرية اللي موجودة فيها .
ثاني الوقائع المهمة اللي حصل في الاسبوع الاول لزيارة المتحف المصري الكبير كانت لسائح البريطاني اللي سلطات الأمن مسكته في المتحف ومعاه طبنجة صوت، وده طبعا ممنوع الدخول بيها لقاعات العرض.. وإدارة المتحف رفضت تسمح للسائح بدخول القاعات الا لما يسيب الطبنجة اللي معاه..  خصوصا أن في تعليمات واضحة وصريحة عن قواعد زيارة المتحف المصري الكبير واللي أهمها عدم حمل الأسلحة او المتعلقات الشخصية الكبيرة أو اصطحاب شنط السفر الكبيرة أو دخول المأكولات والمشروبات جو القاعات.
 

التصرفات الفردية للمصريين داخل قاعات عرض المتحف المصري الكبير 

وزي ما احنا عارفين ان في عدد كبير من المصريين بيحبوا أنهم يسبوا بصمه لهم في أي مكان بيكونوا فيه.. وده اللي حصل جو المتحف المصري الكبير..  لما عدد من اخواتنا البنات نزلوا أكثر من محتوي فيديو علي مواقع التواصل الاجتماعي منهم اللي بتقلد أنها قاعدة جنب مقبرة وبتنادي الي مومياء انها تخرج من التابوت .. ومنهم اللي حاولت تحط روج لتمثال أثري.. ومنهم اللي قرأ قرأن جنب تمثال رمسيس.. وقالوا إنه زيارة الآثار واحدة من الذنوب اللي بيتحاسب عليها الناس يوم القيامة.. وغيرها من المشاهد اللي الهدف منها لم مشاهدات علي مواقع التواصل الاجتماعي.

الهوس اللي موجود عن بعض الناس علي مواقع التواصل الاجتماعي متوقفتش علي كده.. لا ده في بعض الناس عملت صور بالذكاء الاصطناعي صورت فيه المتحف وهو بيتحرق.. والصور دي للاسف انتشرت بشكل كبير جدا علي مواقع التواصل الاجتماعي.. وعلي طول إدارة المتحف نفت الكلام ده بشكل كامل.. واكدت أن المتحف أمن تماما وان الزيارة مستمرة في المواعيد المحددة لها..  وأن مفيش اي حاجة حصلت ممكن تأثير علي الاقبال الجماهيري في الزيارة .

الهوس اللي حصل خلال أول أسبوع من تشغيل الزيارة بشكل كامل في المتحف المصري الكبير خلت هيئة المتحف تفكر انها تفكر في طباعة تعليمات على تذاكر دخول المتحف.. وده بعد الأخطاء الكثيرة اللي حصلت في الاسبوع اللي فات واللي الهدف منه جمع أكبر مشاهدات علي حساب مكان كبير زي المتحف المصري الكبير.

هيئة المتحف المصري الكبير حاليا بتدرس أنها تفرض عقوبات وغرامات مالية مغلظة علي اي زائر هيخالف تعليمات الزيارة.. وده لسبب بسيط جدا وهو أن السلوكيات الخاطئة اللي بيقوم بيها بعض الزائرين هتضر بسمعة مصر وحضارتنا وثقافتنا.. ده غير أنها  هتضايق السائحين في مكان الدولة كلها حاطه أمل عليه أنه هيكون مصدر مهم من مصادر الدخل القومي المصري.