حكاية تخليد أسم بنت رئيس المصرية للمطارات علي أول خدمة رقميه بالمطارات
من كام يوم وتحديدا قبل افتتاح المتحف المصري الكبير... كان في جوله مهمة جدا لوزير الطيران المدني الدكتور سامح الحفني في مطار سفنكس الدولي.. علشان يتفقدوا استعدادات استقبال الضيوف اللي حضرتك حفل الافتتاح والتجهيزات النهائية لاستقبال زوار المتحف المصري الكبير.
تجهيزات افتتاح المتحف المصري الكبير
خلال الجولة وزارة الطيران المدني أعلنت عن طرح خدمة جديدة للمسافرين في المطارات تحت اسم «أسأل مريم».. وكل الناس استغربت اي هيا حكاية أسأل مريم دي.. والخدمة دي هدفها اية.. واشمعني مريم بالذات وليه متكونش اي اسم ثاني .
السؤال ده جاوب عليه المهندس أيمن عرب رئيس الشركة المصرية للمطارات.. واللي قال إن دي خدمة الشركة أطلقتها بالتعاون مع شركة أورنچ مصر.. واللي بتشمل إطلاق أول مساعد افتراضي تفاعلي مدعوم بتقنيات الذكاء الاصطناعي في المطارات المصرية .. كجزء ضمن مشروع متكامل لتحديث تجربة المسافرين وتعزيز الخدمات الرقمية بالمطارات.
المهندس أيمن عرب اتكلم كمان عن الخدمة وقال إنها هتتقدم للمسافرين من خلال أجهزة تفاعلية ذكية حديثة هتكون موزعة جوا المطارات.. وهتمكن المسافرون والزوار أنهم يأخذوا إجابات فورية لأي استفسار تتعلق برحلات الطيران.. أو إجراءات السفر والوصول .. أو مواقع المرافق والخدمات جوا المطار، أو اي معلومات متعلقة بوسائل النقل والتاكسي والليموزين والاتجاهات والمناطق السياحية القريبة أو حتى مواعيد الرحلات.
رئيس الشركة المصرية للمطارات قال كمان إن الخدمة الجديدة اللي أطلقتها الشركة المصرية للمطارات هتكون متاحة قدام المسافرين باللغتين العربية والإنجليزية.. وهتكون واحدة من الخطوات اللي بتقوم بيها وزارة الطيران المدني لتقديم منظومة رقمية متكاملة بتقدم حلول ذكية لتدعم خطة مصر للتحول الرقمي في قطاع الطيران المدني.
طبعا زي ما احنا عارفين ان اي خدمة في أي قطاع بيكون عليها أسئلة واستفسارات كتيرة .. علي ما الناس تفهم اية هيا الخدمة ودي وازاي يقدروا يستفيدوا منها.. وده اللي حصل مع خدمة أسأل مريم في المطارات.. وطبعا في أسئلة كتيرة اتسألت من المسافرين للموظفين عن الخدمة الجديدة.. وآية هيا فايدتها .. والمميزات اللي فيها باعتبارها واحدة من الخدمات الرقمية الجديدة اللي هدفها راحة ورفاهية المسافرين .
اغلب الأسئلة اللي بتوصل من المسافرين للموظفين عن خدمة أسأل مريم في المطارات بيكون لها ردود خصوصا انها بتتعلق بالخدمة.. الا سؤال واحد بس محدش يرضي أو عارف يجاوبه وهو مين هيا مريم اللي الدولة خلدت اسمها علي أول خدمة رقمية في المطارات كلها.. واشمعني مريم بالذات.. وليه ميكونش اي اسم وطني بيخلد ذكري أو حاجة في البلد .
السؤال الصعب ده مصادرنا في جو ايجيبيا جاوبت عليه.. وقالت أن المهندس أيمن عرب حب يخلد اسم بنته واللي اسمها مريم علي أول خدمة رقمية في تاريخ المطارات كلها.. وعلشان كده أطلق علي الخدمة الجديدة إسم مريم .
المصادر كملت كلامها وقالت إن وزير الطيران المدني الدكتور سامح الحفني ميعرفش السر الحقيقي ورا الاسم الجديد للخدمة الرقمية.. خصوصا أن رئيس الشركة المصرية للمطارات له صولات وجولات في قطاع الطيران المدني ده غير عدد السفريات الكتيرة اللي بيقوم بيها واللي وصلت حتي الآن لأكثر من 40 سفيرة محدش يعرف اي سببها ولا الهدف منها اية ولا اية اللي وراها .
الخدمة الجديدة عملت جدل كبير علي مواقع التواصل الاجتماعي .. وطبعا كان في تعليقات سلبية كتيرة عنها.. بس اغلب التعليقات كانت بتدور عن حاجة واحدة بس وهيا إن الخدمة الجديدة ميكونش وراها عبارة « كل سنة وانت طيب يا باشا» زي ما بيحصل في كل مطارتنا.. وبيكون الهدف منها لم بقشيش.. بس لحد دلوقتي محدش عرف اي حاجة عن الخدمة الجديدة.. ولا تكلفتها كام علي وزارة الطيران المدني ولا السؤال بيروح لها ازاي وبأي طريقة ولا الإجابة بتكون ازاي.. وهل هتكون تجربة حقيقة بتقدم نوع من أنواع الرفاهية للمسافرين في المطارات ولا هتكون زيها زي خدمات كتيرة ظهرت وانتهت بدون ما حد يعرف هيا طلعت لايه واختفت فين .
