من الشال للسليبر.. 6 حاجات لازم تعملهم قبل ما تركب قطر أسوان

لو ناوي تشد الرحال لـأسوان، القطر هو أفضل صديق في الـ 14 ساعة دول، وعشان توصل فايق ومش مكسر، خد الخلاصة: أولاً، قطر النوم هو البرنس، ولو ميزانيتك أقل يبقى الإسباني المطور يكسب الـ VIP والتالجو، لأن كراسي التالجو رغم شياكتها متعبة جداً في المسافات الطويلة.

مهم جداً تحجز قبلها بـ 3 أسابيع لأننا في "السيزون" والضغط عالي.
 

وفي الشنطة، "الشال" أو الدفاية أهم من أي حاجة عشان تكييف القطر بيبقى تلاجة بالليل.
وطبعاً "الراحة قبل الشياكة"؛ البس واسع وخد معاك سليبر عشان رجلك متمورمش. بالنسبة للأكل، بلاش تعمرها أوي، شوية سناكس خفيفة تقضي الغرض لأن أكل القطر غالي وجودته نص نص. وماتنساش تحمل أبلكيشن Egypt Trains عشان تختار قطر محطاته قليلة وتوصل أسرع، وتنوروا أسوان يا جماعة ورحلة سعيدة.